Software rumantscha

Cun la translaziun dad Office 2003 e Mozilla Firefox èn vegnids stgaffids divers pleds novs per funcziuns e buttuns da l’interfatscha da software. Auters pleds han survegnì ina nova muntada. Magari na sa betg mintgin sin l’emprim egliada tge che «aviar», «revocar», «reinizialisar» u «telechargiar» vul dir. En quest cas gida il Pledari Grond – da chattar sin www.pledarigrond.ch.

Il fanadur da l’onn 2006 ha la Lia Rumantscha, Microsoft ed il chantun Grischun preschentà ina versiun rumantscha da l’Office 2003. Il pli interessant da questa purschida è probablamain il «spell-checker» – il program da correctura da l’ortografia per il rumantsch grischun. Pia questa funcziun che fa la lingias cotschnas sut pleds che n’èn betg scrits a moda correcta.

L’installaziun da la interfatscha rumantscha ed il spell-checker rumantsch per l’Office 2003 n’è dentant betg dal tut simpla. Dal rest funcziuna l’installaziun mo sche il sistem operativ Windows XP ed Office 2003 èn gia avant maun. (Il pachet da lingua na funcziuna betg cun l’Office 2007, betg cun Mac, betg cun Linux, betg cun Windows Vista etc.)

Qua in mussavia per l’installaziun:

1. Installar l’emprim almain il Service Pack 2 da Microsoft Office ed il Service Pack 3 da Windows XP (sche quai n’è anc betg fatg).
   Schebain questas actualisaziuns èn gia installadas pon ins controllar suandantamain:
   • Service Pack XP: Cliccar cun la tasta dretga da la mieur sin «Arbeitsplatz», lura  sin «Eigenschaften». Sut «System:» stuess esser scrit sch’il Service Pack 3 è installà.
   • Service Pack 2 dad Office: Aviar «Microsoft Word 2003», cliccar sin «Hilfe», lura sin «Über Microsoft Office Word». La sto esser scrit tranter auter «SP2» u «SP3».
   • Sch’il Service Pack3 dad XP manca: Exequir «Windows Update» («Start», «Windows Update»). Il meglier installar gist tut che stat a disposiziun.
   • Sch’il Service Pack 2 dad Office manca: aviar «Microsoft Office Word», cliccar sin «Hilfe» e lura sin «Auf Updates überprüfen» (u sumegliant) ubain directamain telechargiar la datoteca qua ed  installar ella.
2. Installar ils pachets da lingua
   • Installar l’update da lingua per Windows XP. (Telechargiar cun cliccar sin «Download»).
   • Installar l’update da lingua per Office XP. (Telechargiar la datoteca da 5.7 MB cun cliccar sin «Download»).
   • Installar la surfatscha rumantscha per Office XP. (Telechargiar cun cliccar sin «Download»).
3. Configurar las linguas
   Aviar «Microsoft Office 2003 language settings» («Start», «Programme», «Microsoft Office», «Microsoft Office Tools») ed  activar dapertut «rumantsch».

Gratulaziuns! Ussa stuess tut funcziunar.
Lain sperar che l’installaziun da la versiun rumantscha da l’Office 2007 (che duai cumparair anc l’emprima mesadad da l’onn 2010) saja pli simpla.

Ier è finalmain cumparida l’emprima versiun rumantscha dal navigatur Mozilla Firefox.
Telechargia ella da

http://rm.www.mozilla.com/

Installescha ed emprova!

En quest artitgel chattas in per impurtants tips. Commentaris, remartgas, resuns, criticas e cumpliments èn fitg giavischads en la rubrica contact!

Mozilla Firefox - finalmain era per rumantsch.

Cordial engraziament a tuts ch’ans han gidà da realisar la translaziun. En spezial a Sara Hermann, Andrea Cantieni ed Michael Wolf! Plinavant era in grond engraziament a la Lia Rumantscha per il lectorat.

Qua in per tips impurtants avant ch’entschaiver:

Jau lavur enfin uss betg cun Firefox. Sco l’installesch jau?

1. Fai ina visita sin http://rm.www.mozilla.com/. Là pos telechargiar la versiun ch’è adattada per tes sistem.
2. Sche ti has telechargià la datoteca, la pos installar. Quai funcziuna exactamain medem sco che ti ès disà d’installar software.
3. Cun quai es ti gia pront per navigar per rumantsch tras tut il mund

Jau lavur gia cun Firefox, dentant en in’autra lingua. Co pos jau midar?

Il pli simpel è probablamain sche ti deinstalleschas la versiun veglia e telechargias la versiun nova. Quella pos ti lura installar sco descrit sura. Nagina tema, tias datas persunalas na vegnan betg stidadas, sche ti na selecziuneschas betg explicit quai.

Dus curts tips per deinstallar:

Windows: Tscherna «Start» > «Einstellungen» > «Systemsteuerung»
La pos ti tscherner «Software». Lura selecziunar «Firefox» ed «Entfernen».
Lura pos suandar l’assistent da deinstallaziun.

Mac: Trai simplamain il program or da l’ordinatur da programs ed al metta en il chanaster da palpiri.

Pos jau era installar la versiun rumantsch e tudestga?

Quai è sa chapescha era pussaivel. Ti stos avair installà u la versiun tudestga u rumantscha da Firefox. Installescha anc qua il pachet rumantsch. Sche ti telechargias anc quest supplement, pos ti tscherner en il menu «Utensils» (Extras) il punct Linguas. Ussa pos ti adina midar tranter las linguas installadas.

Jau hai gia installà ina versiun rumantscha da Firefox. Vus m’avevas ina giada dà ina datoteca .xpi

En quest cas recumandain nus da l’emprim deinstallar quest XPI – en singuls cas avain nus remartgà ch’i po uschiglio dar problems.

1. Tscherna en Firefox «Utensils» (Extras)
2. Lura va sin «Supplements» (Erweitergungen; Add-ons)
3. Tscherna en la glista da linguas il rumantsch e clicca sin «Deinstallar»

Ussa avessi dad esser pussaivel d’installar la nova versiun da Firefox senza problems.

Sin la pagina d’internet «chattà@rumantsch-grischun» chattan ins ina collecziun da colliaziuns che mainan a software ed applicaziuns da web disponiblas en lingua rumantscha – per gronda part sa chapescha en rumantsch grischun. Ils blers links mainan a gieus per uffants, chattads sin rtr.ch (la pagina da Radio e Televisiun Rumantscha) ed in’autra part èn meds d’instrucziun, ma tranter ils gieus sa chattan anc in pèr purschidas interessantas.

Ussa èsi finalmain uffizial: entaifer il proxim mais vegn publitgà ina versiun rumantscha da Mozilla Firefox.
Suenter bleras uras da lavur da translaziun e divers incaps tecnics avain nus udì cun satisfacziun ch’ils sviluppaders da Mozilla han confermà l’ultima emna che l’interfatscha rumantscha dal navigatur Firefox vegnia distribuida definitivamain cun la nova versiun 3.5 da Firefox. Nus ans legrain da pudair furnir bainprest ulteriuras infurmaziuns.

Bainvegni sin il blog da software rumantscha. En futur publitgain nus qua novitads davart software ch’è disponibla en rumantsch.